VEDTEKTER

§ 1 Organisasjonen vår.

Arna senioruniversitet er ein frivillig, ideell organisasjon der alle er velkomne som medlemer.

§ 2 Føremål.

Arna senioruniversitet sitt motto er: «Ein møteplass for tanke og trivnad». Gjennom foredrag, kurs, gruppeverksemd og utflukter, skal medlemene få høve til å setje seg inn i utvalde fag og emne.

§ 3 Organisasjonsform.

Arna senioruniversitet er ein frittståande juridisk person med medlemer, og er sjølveigande. At den er sjølveigande inneber at ingen, verken medlemer eller andre, har krav på foreininga sin formue eller eigendelar, eller er ansvarleg for gjeld eller andre forpliktingar.

§ 4 Medlemmer.

Alle kan vera medlemer i Arna senioruniversitet. Medlemsskapet føreset at det blir betalt semesteravgift fastsett av årsmøtet.

§ 5 Rettigheiter og plikter knytta til medlemsskapet.

Alle medlemer har rett til å delta på årsmøte, har stemmerett og er valgbare til tillitsverv i Arna senioruniversitet. Medlemer som ikkje har betalt semesteravgift har ikkje stemmerett eller andre rettigheiter. Medlemene pliktar å halde seg til vedtak som er fatta av årsmøtet.

§ 6 Årsmøtet.

Årsmøtet, som skal haldast kvart år innan 15. mars, er Arna senioruniversitet sitt høgaste organ. Årsmøtet er vedtaksført med det antal medlemer med stemmerett som møter, og alle medlemer har ei stemme. Møteleiar skal veljast av årsmøtet. Alle røystingar vert avgjort med vanleg fleirtal. Stemmelikheit vert avgjort ved loddtrekning. I samband med personval kan ein krevje skriftleg røysting. Innkalling til årsmøte skal skje minst 3 veker før årsmøtet. Innkalling skal gå direkte til medlemene og kunngjerast mellom anna i pressa (Bygdanytt). Forslag til saker som skal handsamast på årsmøtet skal vera sendt til styret seinast 2 veker før årsmøtet. Sakliste og sakspapir med innkomne forslag skal gjerast tilgjengelege for medlemene 1 veke før årsmøtet. Årsmøtet kan ikkje handsama forslag som ikkje er oppført på saklista, med mindre 3/4 av dei frammøtte krev det.

§ 7 Årsmøtet sine oppgåver.

Årsmøte skal:

- handsame innkomne forslag

- fastsette kontingent

- vedta budsjett

Årsmøtet skal velja:

- styreleiar

- styremedlemer

- varamedlemer

- revisor

- valgnemnd

Styret konstituerer seg sjølv og vel nestleiar og andre styreverv (til dømes sekretær, økonomiansvarleg og medlemsansvarleg).

§ 8 Ekstraordinært årsmøte.

Ekstraordinært årsmøte vert halde når styret tek avgjerd om det, eller når minst 1/3 av medlemene krev det. Innkalling skjer på same måte som for ordinære årsmøter, med minst 14 dagars varsel. Ekstraordinært årsmøte kan berre handsama og ta avgjerd i dei sakene som er kunngjort i innkallinga.

§ 9 Styret.

Arna senioruniversitet har eit styre på 5 medlemer og 3 varamedlemer. Styreleiar vert vald ved særskilt val for 1 år om gongen. Styremedlemene vert valde for 2 år om gongen, slik at 2 er på val eit år, og 3 er på val neste år. Varamedlemene vert valde for 1 år om gongen. Styret er høgaste myndigheit mellom årsmøta. Styret skal halda møte når styreleiar, eller eit fleirtal av styremedlemene krev det.

Styret skal:

- iverksetja avgjerder gjort på årsmøte.

- skipa til forelesingar og laga program.

- syta for at det vert ført referat frå styremøta.

- administrera og føra naudsynt kontroll med foreninga sin økonomi, og utarbeida

instruks for økonomiarbeidet.

- oppnemna eventuelle komitear, utval eller personar som skal utføra særskilde

oppgåver, og utarbeida eventuelle instruksar for desse.

- representera foreininga utad.

Styret kan fatta vedtak når eit fleirtal av styremedlemene er til stades. Vedtak vert fatta med fleirtal av dei avgjevne stemmene.

§ 10 Signaturrett.

Styreleiar og nestleiar er tildelt signaturrett i fellesskap. Når signaturrett er nytta skal det gjevast melding om dette på neste styremøte.

§ 11 Vedtektsendring.

Endring av desse vedtektene kan berre gjerast på ordinært eller ekstraordinært årsmøte etter å ha vore på saklista, og det vert kravd 2/3 fleirtal av dei avgjevne røystene.

§ 12 Oppløysing.

Oppløysing av Arna senioruniversitet kan berre handsamast på årsmøte, og krev 2/3 fleirtal. Arna senioruniversitet sin formue skal etter oppløysing og gjeldsavlegging tilfalla det formålet som foreininga arbeider for å fremja, ved at nettoformuen blir gjeven til ein ideell organisasjon som årsmøtet bestemmer. Ingen medlemer har krav på foreininga sine midlar eller andel av desse.

Vedtektene er godkjende på ekstraordinært årsmøte 07.11.23.